Juicing/ jusing

Det er positivt for helsa å innta frukt, grønsaker og fiber så lenge du ikkje har allergi eller intoleranse mot dette. Frukt og grønt inneheld fibrar og andre stoff som vi veit er gunstige for kroppen. Innhaldet av antioksidantar, vitamin og mineral kan mellom anna påverka blodsukkerstigninga, blodtrykket og kolesterolnivået, og reknast som viktig for å førebyggja mellom anna kreft og hjarte- og karlidingar.

Evidensen for dette gjeld frukt og grønsaker i si naturlege form. Mengda og samansetninga av gunstige stoff i frukt og grønt varierar også mykje mellom dei ulike råvarane.

Jus har ikkje same verknad på kroppen når det gjeld til dømes blodsukker og tarmmotorikk. Jusing gjer at nokre av dei gunstige fibrane i frukt og grønt går tapt. Dermed får tarmen mindre å arbeide med, og det kan gjere til at ein ikkje kjenner seg mett og difor et meir. 

Likevel finst det teoriar om at frukt- og grønsaksjus har særleg gunstig verknad på helseproblem. Dette byggjer på tanken om at jus-forma gir andre verknader enn å ete råvara slik ho er. Her meiner ein at den flytande forma gjer at kroppen absorberer næringsstoffa lettare og betre. Dette skal spare energi og gje fordøyingssystemet ditt "kvile". Den sparte energien skal kunne nyttast til meir styrking, reparasjon og helsebot. Dette skal igjen redusere risikoen for kreft, styrkje immunforsvaret, reinse kroppen og fjerne giftstoff, forbetre fordøyinga og hjelpe deg å gå ned i vekt. Denne teorien manglar solid vitskapleg støtte.

Påstandar om reinsande verknad finst også i marknadsføringa av spesielle ferdige jusar i helsekostbransjen. Det finst ingen solide haldepunkt for at slik jus gir annan verknad enn råvara i si naturlege form. 

Dei gode verknadane av jusing kviler også ofte på eit stort og hyppig inntak av ferskpressa jus, framfor annan mat og drikke. I tillegg til idéen om at dette verkar reinsande, har jus-diettar også vorte lanserte som gunstige ved urein hud, anemi, arteriosklerose, leddgikt, astma og forstopping. Forsking på dette støttar ikkje påstandar om slike verknadar.

Noko forsking har synt at jus av visse typar frukt og grønt kan auke kroppen sitt opptak av legemiddel, men dette er ikkje det same som at jus i seg sjølv har verknad mot konkrete sjukdommar.

For dei som av ulike årsaker ikkje et frukt og grønt, kan det å drikke jus gjera det lettare å få i seg nokon av dei næringsstoffa som finst i slike råvarer.