Auraterapi

Ideen om auraen som eit eige energifelt kring kroppen kjem frå Veda-skriftene, som er gamle hinduistiske skrifter som ein kan spore attende til 1000-1200 år før vår tid. Veda-skriftene vert og sagt å liggje til grunn for mellom anna det ayurvediske medisin-systemet.

Omgrepet auraterapi vert nytta både om særskilte terapiar der ein meiner å kunne behandle problem direkte i auraen, og om behandling med andre terapiar etter auradiagnostikk. Desse kan vere svært ulike, og behandlaren nyttar då auraen mest som eit «sjekkpunkt» på utviklinga i helsetilstanden din.

Nokre behandlarar vil leggje vekt på kva fargar i auraen din dei synst er for svake eller sterke. Dei vil forklare behandlinga si som å kanalisere energiar som skal tilføre auraen din fargar som det trengs meir eller mindre av. Ideen om at særskilte fargar uttrykkjer ulike energiar, personlegdom og tilstandar, finn ein også att i andre, frittståande terapiar så som fargeterapi.

Nokre utøvarar vil behandle problema som dei ser i auraen din ved å ta på og massere han (auramassasje). Dette skal gje endringar i auraen som skal vere moglege å sjå og kjenne.

Andre behandlarar forklarar behandlinga si med at auraen din treng reparasjon eller reinsing (aurareinsing). Dei forklarar dette med at den indre energistraumen din er blokkert. Aurareinsing kan og innehalde visualiseringsteknikkar og vegleia meditasjon for å hjelpe deg med å tenke positivt og sjå føre deg at du «vaskar vekk skit frå auraen». Ifylgje ayurvedisk medisin skal du også kunne reinse auraen din ved å ta ein dusj eller vere ute i regnver, og medvete sjå føre deg at vassdropane vaskar auraen din. Du skal og kunne ta terapeutiske bad med eteriske oljar, badesalt og urtar i vatnet, eller brenne salvie og puste inn røyken frå den (smudging).

Utøvarane forklarar òg auraen som eit sensitivt instrument som både sender ut og fangar opp signal frå andre menneske, dyr, planter og mineral sin aura. Dei seier at når to slike signal møtest, oppstår det anten harmoni eller disharmoni. Dersom vi får ei kjensle av tiltrekking, fred og tilknytning til nokon eller noko skuldast det harmoni mellom aura-signala og hvis vi kjenner eit ubehag skuldast det disharmoni mellom dei.

Nokre meiner at det er mogleg å endre måten du reagerar på ved å «omprogrammere» auraen din (auratransformasjon), enten korleis du reagera i visse situasjonar, på visse mennesketypar og på faktorar som kan truge helsetilstanden din. Desse behandlarane seier at dei bryt ned det dei kallar aurastrukturen for så å byggje opp ein ny aura til deg. Denne vert omtala som «transformert» og betre og sterkare enn den gamle. Desse utøvarane kallar seg ofte aura-formidlarar og dei forklarar at behandlinga skal endre og forbetre både auraen, utstrålinga og medvitet ditt. Tittelen deira peiker på at det skal finnast visse aura-typar med ulike særtrekk som dei kan formidle til deg.

Behandlarar som baserar seg på konsepta om aura og universell energi, er ofte opptekne av at pasientane skal vere delaktige og aktive i behandlingsprosessen. Mellom anna kan dei tilby seg å lære pasienten sin å sjå, tolke og påverke auraen sin ved hjelp av til dømes fargeterapi, meditasjon, visualisering, eller aktivitetar som det å teikne eller skrive; eller ved å observere andre menneske og freiste å sette seg i deira stad. Andre behandlarar vil gje råd om å endre livsstil og kosthald ut frå kva dei finn i aura-diagnosen.

Andre namn og nemningar

Biofield, biofield therapy