Auraterapi

Ideen om auraen som eit eige energifelt rundt kroppen som det strålar lys frå, kjem frå dei hinduistiske Veda-skriftene, frå om lag 1000–1200 år før vår tid. Desse vert også sagt å danne grunnlaget for det ayurvediske medisinsystemet, der konseptet om auraen står sentralt.

Omgrepet auraterapi vert brukt både om terapiar der ein meiner å kunne påverke auraen din for å behandla helseproblem, og om ulike behandlingar som vert gjeve etter auradiagnostikk, som vil seie at behandlaren vurderer tilstanden og behandlingsbehovet ditt ut frå korleis hen oppfattar auraen din.

Auraen vert sagt å innehalde ulike fargar som representerer forskjellige energiar. Også kvaliteten – styrken – som desse strålane har, skal ha betydning for korleis utøvarar vil behandla deg: Nokre forklarer behandlinga med at dei kan sjå på auraen kva energi du har lite av (fordi auraen strålar svakt, med matt farge), og at dei kan gje deg meir av denne; eller at dei kan dempe energi som dei meiner du har for mykje av (dersom auraen strålar sterkt, med skarp farge).

Andre utøvarar forklarer behandlinga si med at dei kan ta på og massere auraen din (auramassasje). Denne nærast fysiske behandlinga skal kunne føre til gunstige endringar i auraen. Akkurat korleis auramassasje går føre seg verkar uklart, og vi har ikkje funne noko eintydig forklaring på det.

Andre utøvarar forklarer behandlinga si med at dei ser at auraen din treng reparasjon eller reinsing (aurareinsing). Grunnen til dette oppgir dei ofte til å vere at den indre energistraumen din er blokkert. Du skal sjølv kunne reinse auraen din ved lære visualiseringsteknikkar og bruke vegleia meditasjon til å tenkje positivt, og sjå føre deg at du «vaskar bort skit frå auraen», medan du tek ein dusj eller er ute i regnvêr. Du skal også kunne ta terapeutiske bad med eteriske oljer, badesalt og urter i vatnet, eller brenne salvie og puste inn røyken frå den (smudging) for å reinsa auraen.

Nokre utøvarar forklarer også auraen som eit sensitivt instrument, som både sender ut og fangar opp signal frå andre menneske, dyr, plantar og mineral. Dei seier at når to slike signal møtest, oppstår det anten harmoni eller disharmoni. Dersom du då får ei kjensle av tiltrekking, fred og tilknyting til nokon eller noko, skuldast det harmoni mellom aura-signala, og dersom du kjenner ubehag, skuldast det disharmoni mellom dei.

Desse utøvarane meiner også at det er mogleg å «omprogrammere» auraen din (auratransformasjon), for å endre korleis du reagerer i visse situasjonar, på visse mennesketypar eller på faktorar som kan truge helsetilstanden din. Dei seier at dei bryt ned strukturen i auraen din, for så å byggje opp ein ny aura til deg. Denne omtalar dei då som «transformert», og betre og sterkare enn den gamle.

Desse utøvarane kallar seg ofte auraformidlarar, og forklarer at behandlinga deira kan endre og forbetre både auraen, utstrålinga og medvitet ditt. Tittelen peikar på at dei meiner det eksisterer visse standardiserte eller arketypiske auraer, med kvar sine særtrekk og sterke sider, som dei kan formidle til deg.

Utøvarar som baserer seg på konsept om aura og universell energi, er ofte opptekne av at pasientane skal vere delaktige og aktive i behandlingsprosessen. Mellom anna kan dei tilby å lære pasienten å sjå, tolke og påverke si eiga aura, ved hjelp av til dømes fargeterapi, meditasjon, visualisering, eller aktivitetar som å teikne eller skrive; eller ved å observere andre menneske og prøve å setje seg i deira stad. Andre utøvarar vil også gje pasienten råd om å endre livsstil og kosthald ut frå kva dei finn i aura-diagnosen.

Andre namn og nemningar:

Biofelt, biofeltterapi