Øyrelysbehandling

Øyrelysbehandling vert omtala som ein gamal folkemedisinsk tradisjon (nokre kjelder seier hundrevis, med andre talar om fleire tusen år). Behandlinga skal vere brukt både av Hopi-indianarane i USA, indianarane i Sør-Amerika og i den kinesiske medisinen. 

I tillegg til å ha blitt brukt som behandling, skal øyrelys ha blitt brukt i religiøse seremoniar fordi god hørsel i slike kulturar vart sett på som ei gåve frå gudane. I nyare tid skal øyrelysbehandling vere mykje brukt i Italia og Frankrike, Aust-europa, samt i Kina og Japan. Vi har ikkje funne kvar kjeldene har henta desse opplysningane frå.

Tilhengjarar av øyrelysbehandling har fleire teoriar om korleis behandlinga verkar:

Ein teori stør seg på skorsteinseffekten, og seier at øyrevoksen vert sygd ut av øyret på grunn av vakuum som varmen frå det brennande lyset skapar. 

Ein annan teori går ut på at øyrevoksen ikkje vert trekt ut under sjølve behandlinga, men at varmen frå lyset gjer at voksen smeltar, losnar frå øyregangen og kjem ut av seg sjølv i løpet av nokre dagar.

Begge desse teoriane er testa: For å undersøke den første teorien laga forskarar ein kunstig øyregang og måle trykket inni han. Eksperimentet deira synte at det ikkje vart skapt noko negativt trykk under behandlinga, som kunne prove at varmen frå øyrelyset lagar eit vakuum. Etter behandlinga fann forskarane eit pulver på den kunstige trommehinna, og då dei analyserte dette fann dei at det inneheldt fleire alkan (som det finst mykje av i lysvoks, men ikkje i øyrevoks).

Health Canada har fått undersøkt den andre teorien: Under øyrelysbehandling målte forskarar  lufttemperaturen 10 mm frå botnen av det brennande lyset. Den høgaste temperaturen som vart målt der var 22 ºC, som er langt under menneskekroppen sin kjernetemperatur og kva som trengs for å smelte øyrevoks.

Seinare er det gjort undersøkjingar som stadfestar funna i begge desse eksperimenta: Øyrelysbehandling vart gitt til ei gruppe personar der halvparten hadde voks i øyra, og den andre halvparten ikkje. Det vart teke bilete inni øyra før og etter behandlinga, og desse bileta synte at ingen av dei som hadde øyrevoks fekk mindre av det, og at dei utan øyrevoks fekk avsett lysvoks i øyra sine.

Ein tredje teori er at varmen frå øyrelyset stimulerer blodsirkulasjonen i øyra og påvirker spesielle punkt (akupunkturpunkt) der. Dette skal redusere trykk og tettheit i øyra, nasen, panna og bihulane. Meir om behandlingsformer som byggjer på teorien om akupunkturpunkt, kan du lese i denne artikkelen.

Det er fagleg semje om at ein generelt bør vere varsam med å reinse øyra for øyrevoks, fordi det kan gjere skade, tette øyregangen og redusere hørselen. I tillegg kan det redusere mengda av gunstige stoff i øyra: Øyrevoksen lagar ei tryggjande hinne over huda i øyret, og den låge pH-verdien i øyrevoksen hindrar vekst av bakteriar. Overdriven reinsing kan derfor tørke ut huda, og gje kløe, eksem og i verste fall infeksjon.

I Noreg kan alle som vil, kalle seg til dømes "otopat" eller praktisere øyrelysbehandling utan krav til utdanning, under lov om alternativ behandling. Eventuell utdanning i øyrelysbehandling eller anna alternativ behandling gir ikkje same kompetanse, formelle kvalifikasjonar og ansvar som autorisert helsepersonell har.

Drammens tidende skriv i ei sak frå 2010 at dei anslår talet på utøvarar av øyrelysbehandling (otopatar) i Noreg til kring 90, og NRK skriv i ei sak frå 2001 at det då var kring 80 slike behandlarar; og legg til at at det fanst eit eige yrkesforbund kalla Norske Otopaters Forbund. Vi fann ikkje spor av dette i 2024.

Variantar:

Facial candling (Lilin resdung) er ein folkemedisinsk behandlingsteknikk frå Indonesia og Malaysia der ein brukar øyrelys, men fører det brennande lyset kring om i andletet på pasienten. Behandlinga er kjent frå folkemedisinsk tradisjon i Indonesia og Malaysia, og har blitt brukt for å dempe symptom på allergi og betennelse.

Utøvarane meiner at behandlinga reduserer stress, hovudverk og bihuleplagar, og at ho verkar ved at varmen betrer blodsirkulasjonen og trekkjer ut ureinskap frå huda i andletet.

Andre namn:

Auricular Candles, Auriculothérapie, Bougie Creuse, Bougie d'Oreille, Bougie Hopi, Chandelles Auriculaires, Cônage D’oreille, Cônage d'Oreille, Coning, Ear Candle/ Candling, Ear Candle Therapy, Ear Candle Treatment, Ear Coning, Hopi Candles, Otopathy, Terapia de Vela en el Oído, Terapia De Vela Para El Oído, Thérapie Auriculaire Thermale, Thermal-Auricular Therapy