Atlasterapi

Redaksjonen | 15. jul 2021

Verkar det?
Er det trygt?
Kjelder
Atlasterapi vert omtala som varsom massasje av musklane i nakken, for å påverke den øvste nakkevirvelen (atlas).
3D-tegning av skjelett i blått med øverste del av ryggraden uthevet i oransje.
Foto: Colourbox.com

Atlasterapi byggjer på ein teori om at den øvste nakkevirvelen (atlas) hos dei fleste menneske er skeivstilt og ute av posisjon, og at dette fører til ei rekkje ulike helseplager, som til dømes stiv nakke, hovudverk, migrene, mage- og tarmproblem, dårleg konsentrasjon, lite energi, blodtrykksproblem, kolikk, svimmelheit, kvalme, dårleg søvn med meir.

Utøvarane av atlasterapi meiner at dei ved å massere musklar i nakken forsiktig med hendene eller eit massasjeapparat, kan få atlasvirvelen attende i rett posisjon, og dermed kurere slike plager. Ifølgje utøvarane skal det vere nok med éi eller få behandlingar med atlasterapi for å oppnå dette.

Utanlandske kjelder omtalar ofte atlasterapi som ein «kiropraktisk teknikk». I Noreg er det berre personar med helsefagleg autorisasjon som kiropraktor som kan gi kiropraktisk behandling. Norsk Kiropraktorforening uttalar til NAFKAM at atlasterapi ikkje blir rekna som standardbehandling frå deira side, og at det truleg er sjeldan at norske kiropraktorar tilbyr atlatsterapi.

I Noreg kan ein tilby og gi atlasterapi i samsvar med lov om alternativ behandling, som mellom anna inneber at det ikkje blir stilt krav til utøvarar om dokumenterte medisinske kunnskapar for å gi slik behandling. 

Dei helseplagene som atlasterapeutane seier kjem av skeivstilt atlas er vanlege og kan ha ulike årsakar, slik at det kan vere vanskeleg å avgjere kva slike plager kjem av. Det er lite sannsynleg at autorisert helsepersonell innan fysikalsk/manuell behandling vil konkludere med at eit helseproblem kjem av ein feilstilt atlas.

Det vi veit frå fysiologien om massasje og andre fysikalske/manuelle behandlingsformer, er at dei kan verke smertelindrande og betre blodgjennomstrøyminga. Dei kan òg gi ei kjensle av velvêre og hjelpe pasienten til å slappe av. Dette kan lindre symptoma som pasienten opplever. Les meir om dette i artikkelen vår om fysikalske/ manuelle behandlingar.

Som med andre former for behandling, må ein òg rekne med at pasientar kan oppleve placeboeffekt av atlasterapi. Dette kan forklare at pasientar, trass i manglande støtte frå forsking for bruken deira av atlasterapi, likevel kan oppleve effekt av slik behandling.

Ved søk i juli 2021 i kjeldene våre til forsking fann vi ingen oppsummeringar av forsking på atlasterapi. Etter våre kriterium betyr dette at vi ikkje kan seie noko om atlasterapi har effekt eller ikkje mot nokre helseplager.

Vi har ikkje funne opplysningar i forsking på atlasterapi om kjende eller moglege biverknadar eller risikofaktorar ved atlasterapi.
Behandlinga blir omtala som ei varsom form for massasje av musklar i nakken. Så lenge du ikkje har skadar i nakken, eller utset naudsynt skulemedisinsk behandling til fordel for atlasterapi, er det truleg lite sannsynleg at slik behandling er skadeleg. Kraftig massasje veit ein kan forverre tilstanden eller gi nye helseproblem.

For dei som er gravide eller ammar

Verken Natural Medicines eller LactMed inneheldt på søketidspunktet opplysningar om tryggleiken ved atlasterapi spesifikt for desse gruppene. For å vere på den sikre sida, bør desse gruppene drøfte tilstanden sin og atlasterapi med lege eller anna helsepersonell før dei eventuelt brukar atlasterapi.

Vurderer du alternativ behandling?

Les då pasientrettleiinga vår, med generelle åtvaringar og tips til korleis du kan ta meir informerte helseval.

Other websites from NAFKAM: